العميد شامل روكز : نحنا مش عاجزين، لا بل قادرين نفرض إرادتنا بالتغيير بالسبل الدستورية. ملقانا الثلاثاء 18 نيسان الساعة الواحدة بساحة الشهداء

يا شعب لبنان الموجوع.
يا شعب لبنان اللي عم يعاني من دون أي حس مسؤولية من الزعماء السياسيين.
يا شعب لبنان اللي عم ينكوي من التسويات اللي دايما بتكون عحسابه.
نحنا منك ومعك.

أيها اللبنانيون، بدعيكم تشاركونا بتحركنا الشعبي يوم التلاثاء 18 نيسان.صحيح انو العسكريين المتقاعدين وموظفي القطاع العام هني اللي دعوا للتحرك ولكن كل اللبنانيين مدعويين للمشاركة يوم التلاتاء الساعة وحدة بساحة الشهدا.

لازم نكون كتار بالساحات لنعبر عن غضبنا من السلطة اللي بعدها عم تراوغ وتحاصص وتبيع البلد وتاكل حقوقنا وتهدد امننا.
هيدي سلطة عحسابنا مش لخدمتنا وحده العاجز بيقبل فيها.
خلينا ننزل التلاتا عالساحات لنقول انه نحنا مش عاجزين، لا بل قادرين نفرض إرادتنا بالتغيير بالسبل الدستورية.
بلدنا بأزمة من أكبر الأزمات بالتاريخ السياسي والمالي الحديث بسبب سياسات خاطئة وفاسدة على وقت
طويل.
صار الوقت إنو ينوضع لهالسلطة حد.
إجا الوقت إنو تنعطى الفرصة للناس اللي بدها تبني بلد متضامن مش مزارع إقطاعيه متخبايه بالطوائف.
إجا الوقت لنبني دولة مؤسسات بتحفظ حقوق المواطنين وبتأمنلهم عيشهم وفرص عملهم ورعاية ولادهم وطبابتهم وتقاعدهم الكريم من دون حاجة لاي زعيم سياسي.
اجا الوقت لتغيير الوجوه اللي كانت بالسلطة واللي فشلت. مش مسموح، ومش طبيعي، ومش ممكن انه ترجع ذات الوجوه اللي فشلت تبني عن جديد.

خلينا نكون ايد وحدة التلاتا ونطالب بانتخاب رئيس وطني بيجمع كل اللبنانيين.
بدنا رئيس صاحب مشروع لإدارة وطن غني بنسيجه الاجتماعي وكفاءاته.
رئيس بيكون محل ثقة محلية وعربية ودولية، بيعرف وجع شعبنا، وبيضمن انو تعاد الودائع لأصحابها، وبيعمل مع حكومة لوضع خطة تعافي سريعة بتضمن عودة الثقة بدولة لبنان.

خلينا ننزل سوا التلاتا 18 نيسان كرمال بلدنا ومستقبلنا.
ننزل كلنا أمهات وآباء، صبايا وشباب، لنطالب ببناء دولة قادرة ومنتجة ومنفتحة على محيطها العربي وكل دول العالم.
مستقبلنا بإيدنا. بإرادتنا منفرض اللي بدنا اياه ليكون مستقبل ولادنا عقدر طموحاتنا.
ملقانا التلاتا 18 نيسان الساعة وحدة بساحة الشهدا